Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛӸН КОРИНФЯНВЛӒЛӒН КОЛТЫМЫ КОКШЫ СИРМӒШӸЖӸ

6 Глава

1 Йымы доно пуреммӓш.14 Ӹнянӹшӹ эдем ‒ Йымын ӹлӹмӹ вӓржӹ.

1Йымы доно иквӓреш пӓшӓм ӹштӹшӹ ылынаат, мӓ тӓмдӓм сарваленӓ: Йымын благодатьшым нӓлмӹдӓ такеш ӹнжӹ ли.2Вет Йымы попа:
«Ярал веремӓн Мӹнь тӹньӹм колынам,
ытарымы кечӹн тӹлӓт палшенӓм».

Теве ӹнде ярал жеп, теве ӹнде ытарымы кечӹ.

3Служымы пӓшӓнӓ вырсымы ӹнжӹ ли манын, мӓ иктӹлӓнӓт нима шотыштат шӹртнялтмӹ кӱм ана пиштӹ.4-5Цилӓ годымат ӹшкӹмнӓм Йымын служышыжы семӹнь анжыктенӓ: цӹтӹмӓштӹ, эксӹкӹштӹ, нелӹштӹ, пӹзӹрньӹкӹштӹ, мӓмнӓм шимӹ годым, кызаматышты, пыдыранзыкышты, нелӹ пӓшӓштӹ, чӹдӹ амалымашты, постышты,6ирештӹ, пӓлӹмӓшӹштӹ, кужын тырхымашты, пурышты, Святой Шӱлӹшӹштӹ, лачокшы яратымашышты,7тӧр шамакышты, Йымын силаштыжы ‒ мӓ тӧр ӹштӹмӓш вырсы хӓдӹрӹм вургымла дӓ шалахай кидӹштӹ кыченӓ, ‒8лӹмлештмӓштӹ дӓ намысышты, вырсымашты дӓ хвальымашты. Мӓмнӓм алталышеш шотлат, но мӓ тӧр эдем ылына,9пӓлӹдӹмеш шотлат, но мӓмнӓм пӓлӓт, колышеш шотлат, но мӓ теве ӹленӓ. Мӓмнӓм ясыландарат, но мӓ ана колы.10Мӓмнӓм ойхырыктат, а мӓ со ӹвӹртӹшӹ ылына, мӓ незер ылына, но шукым пайдаренӓ, мӓмнӓн ниманаат уке, но цилӓок мӓмнӓн.

11Коринфӹштӹ ӹлӹшӹвлӓ, мӓ тӓлӓндӓ цилӓ гишӓнок нимат шӹлтӹде попенӓ, мӓмнӓн шӱмнӓ тӓлӓндӓ кымдан пачмы.12Тӓлӓндӓ мӓмнӓн шӱмӹштӹнӓ тор агыл, но ӹшкӹмдӓн шӱмӹштӹдӓ тор.13Ӹшкӹмемӹн тетявлӓэмлӓн попымы семӹнь келесем: тенгеок мӓлӓннӓ пӧртӹлтӹдӓ, тӓӓт шӱмдӓм кымдан пачда.

14Ӹнянӹдӹмӹвлӓ доно иквӓреш йӓл хамытыш идӓ кӹцкӓлт. Тӧр ӹштӹмӹн дӓ законым пыдыртымашын ма иканьышты улы? Соты дон пӹцкемӹш лошты махань кӹл улы?15Христос дон Велиар кыце икышын лит? Ӓль ӹнянӹшӹ дон ӹнянӹдӹмӹ ик векӹ лин кердӹт ма?16Йымын пӧртшӹ кыце идолвлӓ доно ик вӓрӹштӹ лиэш? Тӓ ӹлӹшӹ Йымын пӧртшӹ ылыда. Йымы тенге келесен:
«Мӹнь нӹнӹ доны ӹлӓш
дӓ лоштышты кашташ тӹнгӓлӓм.
Нӹнӹн Йымышты лиӓм,
а нӹнӹ Мӹньӹн халыкем лит».

17Седӹндон
«Нӹнӹ логӹц лӓкдӓ,
нӹнӹ гӹц айырлыда, ‒ Господь попа. ‒
Ире агыл докы идӓ тӹкнӹ, тӹнӓм тӓмдӓм Ӹшке докем нӓлӓм».
18«Тӓлӓндӓ Ӓтя лиӓм,
а тӓ Мӹньӹн эргем дон ӹдӹрвлӓэм лидӓ», ‒
манеш Цилӓ Кычышы Господь.


*а 6:2 Ис 49:8

*б 6:4-5 «Постышты»: тидӹм «шужымашты» манынат сӓрӓш лиэш.

*в 6:15 Велиар: худам, ярдымым, сатанам анжыктышы лӹм.

*г 6:16 Лев 26:12, Иез 37:27.

*д 6:17 Ис 52:11.

*е 6:18 2 Цар 7:14, Ис 43:6, Иер 31:9.


предыдущая глава Глава 6 следующая глава