Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ИОАННОНЬ ВАСЕНЦЕ СЁРМАЗО

Глава 5

Кемемась изни те пежетев масторлангонть

1Эрьвась, кие кеми сенень: Иисус – те Христос, се чачозь Пазонть эйстэ. Ды кие вечксы Тетянть, се вечксынзе Сонзэ эйкакшонзояк.2Бути минь вечксынек Пазонть ды топавттано Сонзэ кармавтовкстнэнь, сестэ содатано: миненек эряви вечкемс Сонзэ эйкакшонзояк.3Пазонтень вечкемась невтеви Пазонь кармавтовкстнэнь коряс эрямосонок. Ды Пазонь кармавтовкстнэ аволь стакат топавтомс,4эдь эрьвась, кие чачозь Пазонть эйстэ, изни те пежетев масторлангонть. Ды те изнямось, кона изнизе масторлангонть, – минек кемеманок.

5Кие эно изнясы масторлангонть? Ансяк се, кие кеми: Иисус – те Пазонь Цёра.6Вана Се, кона сась миненек ведь ды верь вельде ды Оймеялтсо, те – Иисус Христос. Сон сась аволь ансяк ведь вельде, Сон сась ведь ды верь вельде. Ды тень кемексты Оймеялтось, эдь Оймеялтось – видечи.7Улить колмо кемекстыцят менель лангсо: Тетя, Вал ды Иневанькс Оймеялт, ды колмонест Сынь – вейке.8Ды улить колмо кемекстыцят мода лангсо: Оймеялтось, ведесь ды вересь. Ды сынь колмонест кемекстыть текень жо.9Минь кемтяно ломанень кемекстамо валонтень, ансяк Пазонь кемекстамо валось седеяк виев. Ды вана кодамо Пазонь кемекстамо валось: Сон макссь кемекстамо вал Эсензэ Цёрадонть.10Эрьванть, кие кеми Пазонь Цёрантень, те кемекстамо валось ули седейсэнзэ. Кие а кеми Пазонтень, се теи Пазонть кенгелицякс, эдь сон а кеми Пазонь кемекстамо валонтень, конань Пазось Сонсь ёвтызе Эсензэ Цёрадонть.11Вана мезде корты те кемекстамо валось: Пазось макссь миненек пингеде пингень эрямо, ды те эрямось Сонзэ Цёрасонть.12Кинь ули Цёразо, сень ули эрямозо, ды кинь арась Пазонь Цёразо, сонзэ арась эрямозояк.

Миненек казезь пингеде пингень эрямо

13Весе тень мон сёрмадыя тыненк, Пазонь Цёрань лементень кемицятненень, вана мекс: содадо: тынк, Пазонь Цёрантень кемезь, ули пингеде пингень эрямонк.14Бути минь, сюлмавозь Сонзэ меленть марто, вештяно Пазонть пельде мезе-бути, Сон минек марясамизь. Секскак минь мольтяно Пазонтень апак пеле ды кемезь.15Ды бути минь содатано: Сон марясамизь минек, зярдо минь вештяно мезе-бути, сестэ минь содатано сеньгак: се, мезе минь вешинек Сонзэ пельде, миненек уш максозь.

16Бути кие неи эсензэ кемиця ялганть пежетьс совамонзо, ансяк те пежетесь а вети куломас, кадык сон озны ялганзо кисэ, ды Пазось максы тонанень эрямо. Те кортамось моли сетнень ланга, конатнень пежетесь а вети куломас. Ули истямояк пежеть, кона вети куломас, ды истямо пежетьс совицянть кисэ мон а тердян озномо.17Эрьва берянь тевесь – пежеть, ансяк ули истямояк пежеть, кона а вети куломас.

18Минь содатано: кияк Пазонть эйстэ чачозесь а сови пежетьс. Эдь Пазонть эйстэ чачозесь вансты эсь прянзо, ды Апарось истямо ломаненть маласкак а молеви.19Содатано: минь – Пазонть эйстэ, ансяк весе те масторлангось Апаронть кедензэ ало.20Минь содатано тедеяк: Пазонь Цёрась сась ды макссь тенек чарькодема, кода содамс алкуксонь Пазонть. Минь эрятано те алкуксонь Пазонть эйсэ, эдь минь эрятано Сонзэ Цёранть эйсэ, Иисус Христоссо. Сон – алкуксонь Паз ды пингеде пингень эрямо!21Тиринь тякинеть! Ванстодо эсь прянк аволь алкуксонь пазтнэде! Аминь.


предыдущая глава Глава 5 следующая глава