Выбрать язык
Книги Ветхого Завета
Книги Нового Завета
с русским текстом1Покш превейчись паро азоравакс стявтсь эстензэ кудо,
аравтсь эйзэнзэ кевень сисем палманть.
2Сон анокстась сывель, човорясь винат,
пурнась каванямонь столь
3ды кучинзе важаванзо ошонь сэрей таркатнева
марявиксстэ яволявтомо:
4– Эрямонь а чарькодицят, садо монень!
Лангапревтненень Покш превейчись мери:
5– Совадо, ярсадо монь анокставт каванявкстнэде,
симеде монь тантей винатнеде!
6Кадынк превтемечинк: сестэ карматадо эрямо.
Ды свал якадо чарькодьксчинь киява.
7Превс путсак визькстэменть-згилицянть – тонсь улят покордазь.
Сялдсак-корясак пазтомонть-зыяновонть – эсеть туртов ули визьксчама.
8Иля сялдо визькстэменть-згилицянть – сон тонь лангс кежиявты.
Тон сялдт-коряк пек превеенть – сон карми вечкеметь.
9Путык превс пек превеенть – сон седеяк превейгады.
Тонавтык видечисэнть – сон ламолгавтсынзе содамочинзэ.
10Инешкипаздонть пелемась – теньсэ покш превейчинь ушодксось,
Иневаньксэнть содамось – теньсэ алкуксонь чарькодьксчись!
11– Мон, Покш превейчись, кувалгавтсынь эрямо чить
ды ламолгавтсынь иеть.
12[Цёрам!] Бути тон пек превеят,
тонь покш превейчись эсеть лезэс
[ды тонь малавиксэть туртов].
Бути нарьгицят-згилицят,
тонсь тень эйстэ кармат майсеме.
[Кие кеми-нежеди кенгелеманть лангс,
се снарты кирдемс варманть,
се панси ливтниця нармунь мельга:
эдь сон стувтынзе эсь винаумарь пирень кинзэ
ды лыты эсь паксянть янганзо.
Сон юты ведтеме чаво моданть трокс
ды ведень аразде кулыця моданть трокс,
сон кедьсэнзэ амолякшны аразенть.]
13Превтемечись – теке лангапрев, пижниця,
мезеньгак а чарькодиця*а тейтерьава.
14Сон озы кудонь кенкшэнзэ икелев, теке инеэзем лангс,
весе ошонтень неявиця сэрей таркас.
15Ды ушоды тердеме ваксканзо ютыцятнень,
виде кияваст молицятнень:
16– Эрямонь а чарькодицят, садо монень!
Лангапревтненень сон мери:
17– Салазь ведесь седе ламбамо,
салава сэвезь кшиськак сехте тантей!
18Ютыцясь а содыяк: сонзэ кудозо – кулозтнень кудост,
ды тов тердезетне понгить тоначинь отьмас.
[А вана тон кирнявтт веёнов, иля аште тосо,
иляк лоткавт вановтот те тейтерьаванть лангс.
Эдь истя тон ютат лиянь веденть вакска.
Тук веёнов лиянь веденть эйстэ,
иля симе аволь эсеть лисьмапрясто.
Сестэ тон кармат эрямо кувать,
ды ламолгадыть тонь иетне.]
*а 9.13 мезеньгак а чарькодиця – Грекень кезэрень ютавтовкссонть: визьксэнь а содыця, визькстэме.
Глава 9