Выбрать язык
Книги Ветхого Завета
Книги Нового Завета
с русским текстом1– Цёрам! Бути тон максыть кемевтема вал лиянь кисэ,
бути саик эсь лангозот сонзэ долконзо –
2тон кершик прят эсеть меревкссэнть,
кундавить эсеть алтавкссонть.
3Цёрам! Тон понгить лиянь кедьс-коморс.
Сестэ тейть оно мезе эсь прят менстемга:
мольть ломанентень, прак пильгезэнзэ
ды энялдт тензэ прят нолдавтомга.
4Иля максо эстеть сутямомс,
иля мере эсь сельмекертненень конявомс.
5Идек прят, кода сёкань орголи охотникенть эйстэ,
кода нармунь ливти кундыцянзо кедьстэ.
6– Нузякс, азё коткудавнень,
варштак сонзэ тевензэ лангс
ды тонавтнек превейчизэнзэ.
7Куш сонзэ арась прявтозо,
чинязозо, лия кармавтыцязояк,
8сон ялатеке кизна ташты эстензэ ярсамопель,
нуема шкасто пурны сатышка кши.
[Эли азё мекшентень ды чарькодик, кода вечкеви тензэ важодемась,
кодамо покш тев сон теи.
Сонзэ важодьксэзэ эряви шумбрачикс инязортнэнень ды весе ломантненень.
Мекшесь весенень паро ёндо содавикс ды вечкевикс.
Куш виень коряс сон лавшо –
превейчинзэ коряс ашти вере.]
9– Нузякс! Зярс тон кармат мадезь аштеме,
зярдо тон сыргозят?
10Бути оштё аламошкас удат, зярскак нувсят,
мейле зярскак кедень кундазь мадезь аштят –
11вант, сы теть кажовчись, теке азгондиця-нельгениця,
ды мутанзат арасьчись, теке маштомапель марто салыця.
[Бути улят аволь нузякс,
сестэ, кода лисьмапря, сы тонь туртов нуема шкась:
арасьчись эйстэть васов оргоди.]
12Апаро ойме, зыянонь теиця ломанесь
свал якси кенгелиця кургонзо тетькезь.
13Сон кончтни сельмесэнзэ, чалгси пильгеть,
сурсонзо невтни салавань тешкст.
14Седейсэнзэ – берянень теема,
арсемасонзо – зыянонь кандома,
бажамосонзо – аладямонь видема.
15Тень кисэ сонензэ апак учо сы ёмамось:
сон вейке липкес сявори ды уш а идеви.
16Вана кототне, конатне пек а вечкевить Инешкипазонтень,
мик сисемтне, конатне Сонзэ туртов нулгодьксэвть:
17прянь верьга кандомасо пештязь сельметь, кенгелиця кель
ды чумовтомонь верень валыця кедть,
18зыянов арсемадо пешксе седей,
берянень кандомо капшиця пильгеть,
19манчиця неиця-яволявтыця,*а кона лексияк кенгелемасо,
ды се, кие види аладямот-сёвномат малавикстнэнь ютксо.
20– Цёрам! Кунсолок тетять превс путоманзо,
саик мельс авать кармавтоманзо.
21Кирдть сынст свал эсь седейсэть,
кандтнек эйсэст кирьгасот.
22Зярдо туят килангов, сынь тонь кармить ветямот.
Зярдо мадят удомо, сынь тонь кармить ванстомот.
Зярдо тон сыргозяткак, кармить парос кортамот.
23Эдь кармавтомась – те валдомтыця,
тонавтомась – валдонь максыця,
ды казямо превс путомась – эрямова ветиця ки.
24Весе те вансттанзат апаро тейтерьавадо,
лиянь нинть валаня кельде.
25Седейсэть иля вельмевте бажамо сонзэ мазычинтень,
[иляст уле сельметь эстеть туворокс,*б]
иля маняво сельме вановтсонзо.
26Эдь усксевицясь нельгсы меельце кши сускомот,
лия мирдень нись саласы ойметь.*в
27Киненьгак кирдеви-арась толось кавалалонзо,
оршамопелензэ апак пулта?
28Кияк якави-арась палыця тонол ланга
пильгалксонзо апак пице?
29Истя эрси лиянь нис васолицянть мартояк:
сонензэ якицянть чумозо свал пандови.
30Салыцядонть безардить сестэяк,
бути сон салы пекензэ пештямс, зярдо вачодо.*г
31А вана бути сонзэ кундасызь,
кедьстэнзэ пандовтсызь сисемксть,
сави максомс весе ули-паронзо.
32Лиянь нинть марто ускурявицянть арасть превензэ,
кие тень теи, ёмавтсы эсь оймензэ.
33Сонзэ учить чавома ды кортавтома,
ды визьксчамастонть сон уш а лисеви.
34Эдь манязь мирденть ацирьгадомазо а мадиця,
ды кежень пандомсто а ули седеймарямозо.
35Чумочинь пандомга сон а саи кодамояк питне-казне
ды а ойми-чевтеми, кода иля ламолгавто тензэ кандозенть.
*а 6.19 манчиця неиця-яволявтыця – лжесвидетель.
*б 6.25 тувор – капкан, ловушка.
*в 6.26 Эли: Эдь ускурявицянть питнезэ кши кочом, лиянь нинть кисэ пандат эрямосот.
*г 6.30 Эли: Салыцянть а чумондыть, бути сон салы пекензэ пештямс,зярдо вачодо.
Глава 6