Библия
Выбрать язык
Книги Ветхого Завета
Книги Нового Завета
с русским текстом
ПСАЛТИРЬ
ОЗНОМАМОРОТ
Глава 31
Пежетте видькстамо ды пежеттнень нолдамост
Давидэнь псалмась. Тонавтома.
1Уцяскав се, кинь нолдазь пежетензэ
ды кинь нардазь зыянов тевензэ!
2Уцяскав ломанесь,
кинень Азорось а ловсы чумокс пежетензэ
ды кинь оймесэ арась кенгелема!
3Зярдо мон чатьмонинь пежеттень,
монь рунгом лавшомгадсь
эрьва чинь кувсемадонть-рангомадонть.
4Чинек-венек стакаль монь лангсо Тонь кедеть,
монь вием маштсь-ёмась истя,
кода кизэнь пси шкасто коськи летькесь.
5Мон панжия Тонеть эсень пежетем
ды эзия кекше эсень чумочим.
Мон меринь: «Видькстан Азоронтень эсень зыянов тевтнеде».
Ды Тон саик монь лангсто пежетень чумонть.
6Тень кисэ кадык эрьва Тонь кемевикс важось
озны Тонеть сестэ, зярдо муеват.
Сестэ чадыведесь а пачкоди сонзэ видьс.
7Тон монь кекшема таркам,
Тон ванстасамак ризкстэ-мелявксто.
Зярдо идесамак, пирясамак монь кеняркссо!
8«Тонавттан тонь, – корты Азорось, –
невтьса теть кинть, конань эзга ютама.
Карман ветямот,
Монь сельмень свал ваныть тонь мельга».
9Илядо уле превтеме айгоронь эли мулонь кондямокс.
Сынст эряви онкстямс новтасо ды онкстьсэ*а,
лиякс сынь кодаяк а кирдевить.
10Покш ризкст-мелявкст пракшныть зыяновонть лангс,
а вана Азоронть лангс кемицянть-нежедицянть
вансты седеймарямось.
11Эрьгеледе Азоронть кувалт ды кенярдодо, видечисэтне!
Кецязь морадо гайгиця вайгельсэ, весе виде седейтне!
Шнамо
*а 31:9 онкстямс новтасо ды онкстьсэ – обуздать уздой и удилами
Глава 31
