Выбрать язык
Книги Ветхого Завета
Книги Нового Завета
с русским текстомДавидэнь псалмась.
1Азоро, весе оймесэнь бажан Тонеть.
2Пазом! Тонь лангс кеман-нежедян,
илямак нолда [зярдояк] прамо визьксчамас,
иляст нарьга душманон монь лангсо.
3Кияк сетнень эйстэ, кие Тонь лангс кеми-нежеди,
а ули совавтозь визьксчамас.
Визьксчамас улить совавтозь сеть,
конат Тонеть авидеть.
4Азоро, невтить монень Тонь кить,
тонавтомак монь Тонь китненень-янтнэнень.
5Ветямак монь Тонь видечинтень ды тонавтомак монь.
Тон монь идиця Пазом.
Чинь перть кемезь учан Эйсэть.
6Азоро, ледстить мельс Тонь паро теветь ды Эсь седеймарямот,
эдь сынь невтезь кезэрень пингестэ саезь.
7Иля ледстне монь од шкань пежеттнень
ды зыянов тевтнень!
Ледстямак монь, Азоро,
Эсь седеймарямот ды парочить коряс!
8Азорось паро ды виде,
Сон невти ки пежетевтненень.
9Сэтьметнень Сон вети видестэ,
тонавты сынст Эсензэ китненень-янтнэнень.
10Азоронть весе китне – те седеймарямо ды алкуксчи сетненень,
кить ванстыть-кирдить Сонзэ вейсэньлувонть*а ды койтнень.
11Азоро, Эсь леметь кисэ нолдыть монь пежетень,
эдь сынь пек покшт.
12Сенень, кие пели Азордонть,
Сон невтьсы кинть, конань эряви кочкамс.
13Сонзэ эрямозо ули пештязь паросо
ды эйкакшонзо-нуцьканзо туртов максови масторлангось.
14Азоронть арсеманзо кармить содамо сеть,
кить пелить Сондензэ.
Сон панжи сыненст вейсэньлувонзо.
15Монь сельмень свал ваныть Азоронть лангс.
Ансяк Сон иди монь зыяндо.
16Варштак лангозон,
ульть седеймарицякс монень,
эдь мон ськамон ды пайстоман.
17Седейризксэнь ламолгадсть,
ливтемак монь кажотнестэ.
18Варштак пиштеман ды пайстомочим лангс
ды нолдыть весе пежетень.
19Варштак монь душмантнэнь лангс, сындест пек ламо.
Сынь азаргадозь пек а вечксамизь.
20Ванстык оймем ды идемак,
илязан пра визьксчамас,
эдь мон кеман-нежедян Тонь лангс.
21Оймень ваньксчись ды видечись кадык ванстасамизь,
эдь Тонь лангс мон кеман-нежедян.
22Пазом, идик Израиленть
весе сонзэ кажотнень эйстэ.
*а 24:10 вейсэньлув – завет, союз, договор
Глава 24