Выбрать язык
Книги Ветхого Завета
Книги Нового Завета
с русским текстом1Моравтомань ветицянтень. «Валскень ашолгадома шкасто» морамолувонть коряс. Давидэнь псалмась.
2Пазом! Пазом! [Марямак монь!] Мекс кадымик монь?
Пек васолат Тон, ды монь авардема валтнэ
а кандыть монень идема.
3Пазом! Мон ранган чинь-чоп – Тон а марят вайгелем.
Авардян ветькак – арась монень оймамо.
4Ансяк Тон, Иневанькс, озадо аштят инеэземеть лангсо.
Тонеть пачкодить Израилень шнамоморонзо.
5Тонь лангс кемсть-нежедсть минек покштятне-тетятне,
кемсть-нежедсть, ды Тон идилить сынст.
6Тонеть сеересть-пшкалесть сынь, ды Тон идекшныть сынст.
Тонь лангс кемсть-нежедсть ды эзть ульне совавтозь визьксчамас.
7Мон жо сукс, аволь ломань,
весенень пейдема тарка,
ломанень седеень кельмевтиця.
8Весе, кить монь неить,
пеедькшнить-нарьгить лангсон
ды чаравтыть прясост:
9«Сон кемсь-нежедсь Азоронть лангс,
кадык Азорось лезды тензэ, кадык идесы сонзэ,
бути сон тукшны мелезэнзэ».
10Тон ливтимик авань потсто,
поти эйкакшокс улемстэнь путыть монь эйс кемема Тонь лангс.
11Чачома чистэнь саезь мон максозян Тонеть,
пиже эйкакшокс улемстэнь Тон уш монь Пазом.
12Иля аште васоло монь эйстэ,
эдь кажось*а маласо, а вана лездыця арась.
13Ламодояк ламо букат стясть монь перька,
Васанонь*б идем букат пиримизь монь.
14Автизь кургост монь лангс, кода ирныця левть,
конат анокт ракшань раздеме.
15Ризнэмадонть мон валовинь ведь ладсо,
весе ловажан явновсть,
седеем теевсь штань кондямокс,
солась потмозон.
16Сёвонень чакшке ладсо коськсь вием,
келем педясь кургоменелезэнь.
Тон теимик монь уловонь кондямокс.
17Монь пиримизь пинеть,
пурнавсть перькан ламодояк ламо зыянонь теицятнеде,
пачк пелизь монь кедень ды пильгень△.
18Весе ловажан-пакарень лангс лиссть.
Сынь ваныть згилязь монь лангс.
19Сынь явить монь оршамопелень эсь ютковаст,
явить оршамкан, жеребейсэ каязь.
20Азоро, иля аште васоло монь эйстэ.
Тон, монь вием, капшак тень лездамо.
21Идик монь оймем тородо,
вейкине эрямом – кискатнеде.
22Ванстомак монь левень кургонть эйстэ
ды идем букань сюротнень эйстэ.
Марямак монь ды идемак!
23Карман ёвтнеме Тонь эйстэ монь раськенть туртов,
моразь шнамот сынст промкссо.
24Азордонть пелицятне! Шнынк Сонзэ!
Весе Иаковонь буесь! Инелгавтык Сонзэ!
Улезэ Сон пек лововикс весе Израилень раськенть туртов!
25Сон эзизе велявто прянзо
ды несь пайстомонть пиштеманзо.
Сон эзизе кекше сонзэ эйстэ чачонзо.
Мекевланг, маризе, зярдо тона тердизе Сонзэ.
26Мон шнатан Тонь ине промкссо,
топавтсынь эсь алтамон Тондеть пелицятнень икеле.
27Кадык ярсыть кажовтне пекест пешкедемс.
Кадык шныть Азоронть весе, кить Сонзэ вешнить.
Кадык эрить сынь пингеде пингес.
28Mасторлангонь весе ёнкстнэ мельс ледстясызь Азоронть
ды мекев велявтыть Сонензэ.
Весе раськетне сюконить Тензэ.
29Эдь Азоронть кедьсэ – инязорксчись.
Сон весе раськетнень Ветиця.
30Весе модалангонь виевтне ярсыть ды сюконить Тензэ.
Сонзэ икеле прыть кумажа лангс весе модапулекс теевицятне,
сетне, конатнень арась виест ванстомс эсь эрямост.
31[Монь] раськенть поладыцятне кармить важодеме Тензэ,
секскак сыненст кармить пингеде пингес мереме Азоронь ломанть.△
32Сынь сыть ды кармить ёвтнеме ломантненень, конатне чачить,
Азоронть видечинь тевтнеде: ”Тень Сон теизе!”
*а 21:12 кажо – беда, несчастье
*б 21:13 Васан – тарка Иордан леенть чилисема ёно; Иордан чуди пелеве ёндо обед ёнов.
Глава 21