Библия
Выбрать язык
Книги Ветхого Завета
Книги Нового Завета
с русским текстом
ПСАЛТИРЬ
ОЗНОМАМОРОТ
Глава 143
Уцяскав раськесь, конань Пазозо – Азорось
Давидэнь псалмась. Голиафонь каршо.
1Шназь улезэ Азорось, монь кевпандось!
Сон тонавты монь кедень тюреме
ды сурон – войнань ветямо.
2Седеймарицям ды пирявксом,
кекшема таркам ды Идицям!
Монь ваксаром!
Сонзэ лангс мон нежедян.
Сон максы раськем кедем алов.
3Азоро! Кие истямо ломанесь?
Ялатеке Тон мелявтат сондензэ!
Кие истямо ломанень эйдесь?
Ялатеке Тон яват сонензэ мель!
4Ломаненть эрямозо ялтонь кондямо,
сонзэ чинзэ ёмить теке сулей.
5Азоро! Чиремтик Тонь менеленть ды валгт!
Токазевть пандотнес – ды эйстэст туи качамо.
6Верьгедть ёндолсо ды сравтнить душманот.
Нолдыть Тонь налтнэнь ды чиевтить сынст.
7Венстик верде Тонь кедеть,
менстемак монь ды идемак покш ведтнеде,
лия раськень ломантнень кедест эйстэ.
8Сынст кургост кортыть стяконь тевде,
ды сынст вить кедест – манчемань кедь.
9Пазом! Од моронть мораса Тонеть,
кемень струна марто лирасо седяса Тонеть.
10Тон казят инязортнэнень идема
ды идят Давидэнь, Тонь уренть, кежей тородо.
11Менстемак монь ды идемак
лия раськень ломантнень кедест эйстэ,
конатнень кургост кортыть стяконь тевде,
ды конатнень вить кедест – манчемань кедь.
12Кадык минек цёранок улить эсест од шкасто
рацяня чувтонь кондят,
минек тейтеренек –
покш кудонь мазылгавтоматнень кондят.
13Кадык минек утомонок улить пешксеть,
пешксе пештязь эрьва кодамо кшисэ-сюросо!
Кадык минек ревенек-сеянок раштыть тёжань-тёжасо
минек луганартнэнь лангсо!
14Кадык минек буканок парсте куялгадыть!
Кадык минек куротнева а ули а саламо,
а ёмамо, а рангома!
15Уцяскав раськесь, конань весе те ули.
Уцяскав раськесь, конань Пазозо – Азорось!
Глава 143
