Библия
Выбрать язык
Книги Ветхого Завета
Книги Нового Завета
с русским текстом
ПСАЛТИРЬ
ОЗНОМАМОРОТ
Глава 131
Пазонь кочказтне, Давид ды Сион
Верев куземань моро.
1Ледстить, Азоро, Давидэнь
ды весе сонзэ кажотнень,
2кода сон божась-пежедькстась Азоронтень,
макснесь алтамо Иаковонь Виев Пазонтень:
3«А сован мон эсь кудозон,
а мадян эсь удома тарказон,
4а мерян удомо монь сельметненень
ды нувсеме монь сельмекертненень,
5зярс а муян тарка Азоронтень,
кудо Иаковонь Виев Пазонтень».
6Минь маринек вейсэньлувонь озпаргодонть*а Ефрафасо,
муинек сонзэ Иаримень паксятнестэ.
7Мольтяно Азоронть эрямо таркантень,
сюконятано пильгепезэнзэ озпаргонть вакссо.
8Сак, Азоро, Тонь оймамо таркантень, –
Тон ды Тонь виевчинь озпаргось.
9Тонь озатятне оршавить видечисэ,
ды Тонь кемевикс важотне кенярдозевить.
10Давидэнь, Тонь уренть кисэ,
иля велявто Эсь вадевтенть△ эйстэ.
11Азорось пежедькстамо вельде макссь Давиднэнь кеме вал
ды а туи тень эйстэ:
«Тонь раськень поладыцянть
озавтса тонь инеэземеть лангс.
12Бути тонь цёратне кармить ванстомо
Монь вейсэньлувонть ды Монь мерематнень,
конатненень Мон тонавтсынь сынст,
сестэ сынст цёрасткак пингеде пингес
кармить аштеме инязорокс тонь инеэземеть лангсо».
13Азорось кочкизе Сиононть,
улезэ [сон] Тензэ эрямо таркакс:
14«Те Монь оймамо таркам пингеде пингес,
тезэнь лоткан эрямо – сон мелезэнь тусь.
15Мон чанстян Сиононтень ярсамопеленть,
пешкедемс андсынь кшиде сонзэ кажовтнень.
16Сонзэ озатятнень оршасынь идемасо,
ды сонзэ кемевикс важонзо
кармить кенярдомо ды эрьгелеме.
17Тосо Мон кемекстаса Давидэнь азорксчинзэ
ды кирвазтян валдо Монь вадевтентень.
18Душманонзо оршасынь визьксчисэ.
А вана вадевтенть прясо
карми сияждомо сонзэ каштазось».
*а 131:6 вейсэньлувонь озпарго – ковчег завета
Глава 131
