Выбрать язык
Книги Ветхого Завета
Книги Нового Завета
с русским текстомАллилуя!
1Зярдо Израилесь лиссь Египетстэ,
Иаковонь буесь – лия раськень ломантнень ютксто,
2сестэ Иудась*а теевсь Пазонь иневанькс эрямо таркакс,
Израилесь – Сонзэ ули-парокс.
3Весе тень неизе иневедесь ды оргодсь,
Иорданось кармась чудеме мекевланг.
4Пандотне тандадомадонть кирнявтнесть реве ладсо,
губорькстнэ – вирез ладсо.
5Иневедь, мезе мартот, мекс тон оргодить?
[Тонь мартояк мезе,] Иордан,
мекс тон кармить чудеме мекевланг?
6Пандот, мекс тынь кирнявтнетядо тандавтозь реве ладсо,
ды тынь, губорькст, вирез ладсо?
7Сорнок, мода, Азоронть чачонзо икеле,
Иаковонь Пазонть чачонзо икеле!
8Сон кевпандонть теи ведень эрькекс
ды кевенть – ведень лисьмапрякс.
9Аволь миненек, Азоро, аволь миненек,
а вана Эсеть лемезэть макст инексчи,
Эсь седеймарямот ды алкуксчить кисэ.
10Мекс лия раськетненень кортамс:
«Косо сынст Пазост?».
11Минек Пазось менельлангсо [ды модалангсо].
Сон теи весе сень, мезе мелезэ.
12А вана лия раськетнень ламо пазост, сиясто ды сырнестэ,
сынь – ломанень кедьтеевкст.
13Сынст улить кургост – ансяк сынь а кортыть.
Сынст улить сельмест – ансяк сынь а неить.
14Сынст улить пилест – ансяк сынь а марить.
Сынст улить судост – ансяк сынь чине а марить.
15Сынст улить кедест – ансяк сынь а марить ёжо.
Сынст улить пильгест – ансяк сынь а якить.
Сынст кирьгапаресткак а нолды вайгель.
16Сынст теицяст молить пазост ёнов, кода весе лиятнеяк,
кить кемить-нежедить неть пазтнэнь лангс.
17Израилень [раськесь], кемть-нежедть Азоронть лангс!
Сон лездыцянок ды ванстыцянок!
18Аарононь*б буесь, кемть-нежедть Азоронть лангс!
Сон тынк лездыцянк ды ванстыцянк!
19Азордонть пелицятне, кемеде-нежедеде Азоронть лангс!
Сон тынк лездыцянк ды ванстыцянк!
20Азорось кирди минек Эсь мельсэнзэ
ды чансти-баслави [эйсэнек].
Сон чансти Израилень раськенть,
Сон чансти Аарононь буенть.
21Азорось чансти Сондензэ пелицятнень,
кода содавикстнэнь, истя асодавикстнэньгак.
22Кадык Азорось ламолгавтсы весе паронть
тыненк ды эйкакшонк туртов.
23Баславидизь-чанстидизь тынк Азорось,
менелень ды модань теицясь.
24Менелесь – Азоронть,
а вана моданть Сон максызе ломантненень.
25Аволь кулозтне кармить шнамо Азоронть,
аволь сетне, конат валгсть калмос.
26А вана минь, [эрицятне], карматано Азоронть шнамо
ней ды пингеде пингес.
Аллилуя!
*а 113:2 Иуда – тесэ: Израилень раськенть лия лемезэ
*б 113:18 Аарон – те Израилень раськенть васенце озатязо (священник) ды озатяньпрявтозо (первосвященник). Сонзэ мельга весе сонзэ цёранзо-нуцканзо ульнесть озатякс.
Глава 113