Библия
Выбрать язык
Книги Ветхого Завета
Книги Нового Завета
с русским текстом
ПСАЛТИРЬ
ОЗНОМАМОРОТ
Глава 107
Пазом, лездак лепштямс душмантнэнь!
1Давидэнь псалмась. Моро.
2Пазом, монь седеем анок,
[монь седеем анок].
Карман морамо ды псалмань ладсеме весе оймесэнь.
3Сыргозеде, лирась ды арфась!
Мон сыргозтьса валскень зорянть.
4Азоро, Тонь карман шнамо раськетнень ютксо,
Тонь карман моравтомо буетнень ютксо.
5Эдь Тонь покш седеймарямось менельде сэрей,
Тонь видечись – пельтнес.
6Пазом, ульть кепедезь менельде сэрейстэ
ды Тонь инексчить неявозо весе моданть лангсояк!
7Кадык ванстовить Тонь вечкевикстнэ!
Идить сынст виев вить кедьсэть
ды марямак монь!
8Пазось мерсь иневанькс эрямо таркасонзо:
«Покш кеняркс марто явса Эсень ломантненень Сихементь
ды онкстнеса тенст Сокхоф лайменть.
9Галаадось – Монь, Манассиясь – Монь,
Ефремесь – Монь прясо шлёмом,
Иудась – Монь инязоронь мандом.
10Моавось – Монь шлямо кедьгем,
Едомонть лангс ёртса карсемапелем.
Филистиянь моданть коряс кенярдозь серьгедян».*а
11Кие совавтсамам монь кемекстазь ошов?
Кие пачтясамам монь Едомов?
12Арази те аволь Тон, Пазом, кона кадымизь минек,
ды кона а моли минек ушмотнень марто?
13Лездак тенек, лепштязтненень, –
ломанень пельде лезксэсь мезеяк а максы.
14Пазонть марто минь ине тевть тейтяно.
Сон чалгсесынзе минек душмантнэнь.
*а 107:8-10 Неть валрисьметнесэ ёвтазь весе таркатне совить Израилень масторонтень, Моавдо, Едомдо ды Филистиянь модадо башка. Сынь Израилень вакссо эриця раськеть.
Глава 107
