Bible Stories
Выбрать язык
Choose Old Testament Story
Choose New Testament Story
ДАНИИЛ ЛЕВЪЁСЛЭН ГУАЗЫ
Даниилэз синазькыль карись эксэй юртысь кивалтӥсьёс Дарий эксэй доры лыктыса урттылӥськизы, Даниил эксэйлэсь законзэ санэ уг, пе, поны, нуналлы быдэ куинь пол ас Инмарезлы вӧсяське, пе. Тае кылыса, эксэй ӝожомиз, малпаз Даниилэз утьыны. Но эксэй юртысь кивалтӥсьёс шуизы, эксэйлэсь косонзэ быдэстытэк кельтыны уг яра. Соку эксэй Даниилэз левъёсты возён гуэ куштыны косӥз. Со тодӥз, Данииллэн Инмарез – быдӟым Инмар шуыса, соин со Данииллы шуиз: «Тынад Инмаред, Кудӥзлы тон ялан вӧсяськиськод – Со тонэ утёз!» Собере эксэй аслаз юртаз бертӥз, сиськытэк изьыны выдӥз, но быдэс уй ӵоже умме усемез ӧз луы. Ӟардон азьын со левъёсты возён гу доры лыктыса, ӝожмыт куараен Данииллы вазиськиз: «Даниил, Улэп Инмарлэн ляльчиез! Тынад Инмаред, Кудӥзлы ялан вӧсяськиськод, левъёслэсь утьыны быгатӥза?» Даниил вазиз: «Мынам Инмаре Аслэсьтыз кылчинзэ ыстӥз но левъёслэсь ымзэс ворсаз, соин соос номыр уродзэ лэсьтыны ӧз быгатэ, уго мон Инмар азьын дун-чылкыт вал, тон азьын но, эксэй, мон нокыӵе но йыруж ӧй лэсьты».
Дарий туж шумпотӥз Данииллэн улэп кылемезлы, сое гуысь ӝутыны косӥз. Ӝутэм беразы адӟизы: левъёс сое чик но вӧсь кариллямтэ. Даниилэз юнме янгыш карисьёсты, эксэйлэн косэмезъя, левъёсты возён гуэ куштӥзы. Гу пыдсы ӧз на вуэ, нош левъёс соос вылэ тэтчизы но лыоссэс сузмытӥзы.
Та учыр бере Дарий эксэй гожтэт гожтӥз но эксэйлыкезлэн вань ёросъёсаз сое ыстыны косӥз. Та гожтэтаз со таӵе косон сётӥз: вань калыкъёс Данииллэсь Инмарзэ сӥлы мед карозы, малы ке шуоно, Данииллэн Инмарез – со улэп Инмар, кулӥсьтэм-бырисьтэм, Солэн эксэйлыкез пумтэм вапумъёс ӵоже улэ. «Со мозмытэ, уте, паймымон ужъёс но тодметъёс лэсьтэ инмын но, музъем вылын но. Со Даниилэз левъёслэн кужымзылэсь мозмытӥз!» – тазьы гожтэмын вал та гожтэтын.
Даниил 6:12-28
238 
