Bible Stories
Выбрать язык
Choose Old Testament Story
Choose New Testament Story
ДАНИИЛ НО СОЛЭН КУИНЬ ЭШЪЁСЫЗ
Вавилонлэн Навуходоносор эксэез юртэныз кивалтӥсезлы косӥз пленэ шедем израиль пиос пӧлысь егит пиосты бырйыны но эксэй юртын ужатыны. Соос луыны кулэ вал эксэйлэн яке мукет кивалтӥсьёслэн выжыысьтызы потэмъёс, ымнырын но, мугорын но чебересь, дышетскыны визьмоесь егит пиос. Быръем пиосты эксэйлэн ӝӧк вылысьтыз сиёнэн, винаен сюдыны-вордыны косӥз. Куинь ар ӵоже соосты наукалы, кыллы дышетыса-нодъяса возьыны косэмын вал.
Израильысь егит пиосын ӵош татчы вуизы Даниил, Анания, Мисаил, Азария. Вавилон эксэйлэн юртаз Даниилэз – Валтасар, Ананияез – Седрах, Мисаилэз – Мисах, Азарияез – Авденаго шуыса нимазы. Эксэй ӝӧк вылысь сиёнэн, винаен Даниил ассэ уг сапта шуыса малпаз, уго та сиёнъёс дасямын луыны быгатӥзы Моисей законъя израиль калыклы сиыны лэзьымтэ пудо-животъёслэсь, тылобурдоослэсь. Эшшо соос пӧлы сульдэръёслы курбонлы ваем сӥль но сюрыны быгатоз. Соин ик Даниил эксэй юртэн кивалтӥсьлэсь аслыз но, эшъёсызлы но кӧтсэс тырыны емышъёс куриз, сюзэс юзматыны – ву. Нырысь ик кузёйыр куалектӥз вал куронзэс кылыса: егит пиос начармизы ке, со понна эксэйлэн солы вожез потоз. Нош Даниил сое либатыны быгатӥз. Чакланы-эскерыны косӥз: дас нунал ӵоже емышъёс но ву гинэ сётыны, нош собере эскерыны, мар соосын луоз. Дас нунал ортчыса, израиль пиослэн ымныръёссы, мукет егитъёслэн сярысь, чебергес адӟиськизы. Данииллы, Ананиялы, Мисаиллы, Азариялы Инмар тодонлык, визьлык сётӥз, нош Даниилэз адӟонъёсты, уйвӧтъёсты валэктыны быгатӥсь кариз.
Куинь ар ортчем бере, ваньзэс быръем израиль пиосты эксэй дораз вайыны косӥз. Котькудӥныз нимысьтыз вераськем бераз, эксэй таӵе малпанэ вуиз: соос пӧлын Данииллы, Ананиялы, Мисаиллы, Азариялы укшасез одӥгез но ӧй вал. Соин ик соосты эксэй доры ужаны-тыршыны кельтӥзы. Мар сярысь гинэ эксэй егит пиослэсь ӧз юа, соос визьмо ответ сётыны быгатылӥзы.
Даниил 1:3-20
230 
