Choose Language
Old Testament Books
New Testament Books
view with a second Bible
1 Ты лāтӈанэ лāвме юи-пāлт Ӣсус ханисьтахтын хумиянэ ёт Кедрон нампа сōюм тапāлн, сāдын тув минас. Та сāдын Тав ёте ханисьтахтын хумиянэ ōс сялтсыт.2 Ты мā Таве хӯлтнэ хум Иуда ōс вāстэ. Ӣсус вāтихал ханисьтахтын хумиянэ ёт тув-атхатыглāлсыт.3 Иуда сыраиӈ хōнт хумит ос сяр яныг пӯп ōйкатын, фарисейтын лусытан хумит ёт висанэ, панарыӈ ос наиӈ лāмпат ос хōнт писаль-сыраиӈ тāгыл тув та ёхтысыт.4 Ӣсус сартын тāгыл Тав ётэ мāныр ēмтнэтэ урыл вāме мāгыс, тāн палттыланыл кон-квāлыс ос лāвыс: ”Хотъют кинсэгы̄н?”5 Тавēн ювле-лāвыглāлсыт: ”Назаретныл ōлнэ Ӣсус”. Ӣсус тāнанылн лāви: ”Тыи Ам”. Тāн ётаныл таве хӯлтнэ хум Иуда лю̄лис.6 Ос Тав тох лāвме порат ”тыи Ам” тāн юв-ӯрхатым мāн хоми ё̄л-патсыт.7 Ōс тāнаныл ōс кӣтыгласанэ: ”Хотъют кинсэгы̄н?” Тāн лāвсыт: ”Назаретныл ōлнэ Ӣсус”.8 Ӣсус тāнанылн ювле-лāви: ”Ам ты лāвсум, тыи Ам ты; Āнум ке кинсылы̄н, тāнаныл хот-тāратэ̄н, вос минэ̄гыт”.9 Вос Тав лāвум лāтӈе сирыл ēмты: ”Наӈ Āнумн мӣм утаны̄нныл Ам нэ̄мхотъют ат порыслāсум”.10 Симон Пēтыр хум сырай ōньсис, сырае кон-хасумастэ, пӯп-ōйка палт рабыг ōлум ут сыраил ю̄ныгтастэ, ёмас-пāл пале яктапавес. Малх нампа раб тав ōлыс.11 Ос Ӣсус Пēтыр нупыл лāвыс: ”Сыраин сырай ōсьнэ сыпалӣн мāгēлын, Ам ман Āсюмн маим āным аюӈкве ат вēрмӣлум?”12 Тōнт сираиӈ хōнт хумит ос тāн кӯсяяныл ос еврей лусытан мāхум Ӣсус пӯвсаныл ос ё̄л нэ̄гсаласāныл.
13 Сартын Тав Анн нампа хум палт тотвес, та хум Каиафа упōйкаг ōлыс, тав та тāл сяр яныг пӯп-ōйкаг ōлыс.14 Та Каиафа тав ты еврей мирн лāвыглāлыс: ”Акв хōтпа мире мāгыс сорумн патнэ̄те ёмаснувēг ōлы”.
15 Ӣсус юи-пāлт Симон Пēтыр ос мōт ханисьтахтын хумитэ ё̄мсы̄г; та ханисьтахтын хум пӯп-ōйка вāстэ, таимāгыс тав пӯп-ōйка ōсь кӣвырн Ӣсус ёт тув-ся̄лтыс.16 Пēтыр ōсь коны-пāлт лю̄лис. Тувыл пӯп-ōйка вāнэ мōт ханисьтахтын хум āви ӯрнэ раб э̄ква ёт потыртахтас, ос Пēтыр юв-тӯлыстэ.17 Тыт ань āви ӯрнэ раб э̄ква Пēтырн лāви: ”Ты Э̄лумхōлас ханисьтан хумиянэ̄тныл аман ат ōлэ̄гын тай?” Тав лāвыс: ”Āти”.18 Та халт рабыт ос лусытан мāхум асирмаг ōлнэ̄тэ āрась нāй пāлтсыт, тāн лю̄льсыт ос толтыглāхтасыт. Пēтыр ос тāн ётаныл лю̄ляхōлыс ōс толтыглāхтас.
19 Пӯп ōйка Ӣсус Тав ханисьтахтын хумиянэ урыл ос Тав ханисьтапе урыл кӣтыглāстэ.20 Ӣсус тавēн лāвыглāлыс: ”Ам мир ля̄льт пуссын сохтыл потыртāлсум, Ам еврей мāхум акван-атхатнэ синагогатт ос ялпыӈ колытт ханисьтāлсанум, тӯйтхатым нэ̄матыр ат потыртāлсум.21 Манры̄г Āнум китыглылы̄н? Хӯнтлалум мāхум китыглэ̄н, Ам тāнанылн мāныр потыртāлсум; тāн вāгāныл, Ам мāныр потыртāлсум”.22 Тав тох лāвмēт, Тав ля̄патэ̄т лю̄люм аквмат лусытан ут Ӣсус пайтэ̄т ю̄ныгтастэ, тымус лāвыс: ”Тысӣрыл Наӈ пӯп-ōйка ёт потыртэ̄гын?”23 Ӣсус тавēн ювле-лāвыс: ”Ам лю̄льсаӈ ке лāвсум, наӈ хултэ̄лын хōт лю̄льсаӈ лāвсум, ос ёмсякве ке лāвсум, Āнум манры̄г рāты̄лын?”24 Аннан Тав акван-нэ̄гсалым Каиафа пӯп ōйка палт кетвес.
25 Пēтыр Симон лю̄ляхōлыс ос тōлтылāхтас. Тыт тавēн мāхум лāвсыт: ”Наӈ Тав ханисьтахтын хумитэ āти?” Тав хот-воратас ос лāвыс: ”Āти”.26 Пӯп ōйка палт рабыг рӯпитам акв хум, та хум ань Пēтырн пале хот-сāграпам хумин рӯтыг ōлыс, лāви: ”Улпыл наӈын ам Тав ётэ садыт вāслум?”27 Пēтыр ōс хот-воратас; ос аквта тāра ты торыг сиськурек та рōӈхалтахтас.
28 Каифаныл Ӣсус хōн ōлнэ яныг колн тотвес. Алпылыг ōлыс, еврей мāхум ӣксям вāрмалил пилнэ̄ныл мāгыс яныг колн юв ат-ся̄лтсыт, тымус Пасха ялпыӈ хōтал тэ̄нут тэ̄ӈкв вос вēрмысыт.29 Пилат, Юдея-мā кӯсяй, тāн палтаныл кон-квāлыс ос китыгласāнэ: ”Ты Э̄лумхōлас мāныр мāгыс нāн сутытаӈве таӈхилы̄н?”30 Тāн тавēн ювле-лāвсыт: ”Тав хорахсиг ат ке ōлыс, тōнт Таве наӈ палттылын хунь тотнувлӯв”.31 Пилат тāнаны̄лн лāвыс: ”Нāн Таве вӯелы̄н, ос нāнти сакконанын сирыл Таве сутытэ̄лы̄н”. Еврейт тавēн лāвсыт: ”Мāнавн нэ̄мхōтпа ат рōви сорумн миӈкве”.
32 Тыи тасир та ēмтыс, хомус Ӣсус лāвыс. Тав лāвыс, манхурип сормыл тах сорумн паты.33 Тōнт Пилат ос яныг колэ̄н юв-ся̄лтыс ос Ӣсус вōвыстэ, ос лāвыс: ”Наӈ еврей хōны̄г ōлэ̄гын?”34 Ӣсус ювле-лāвыглāлыс: ”Тыи наӈти лāтӈāнын, ман ос мōтаныт наӈын Ам урумт тох лāвсыт?”35 Пилат ювле-лāвыглāлыс: ”Ам ман Юдей хумы̄г хунь ōлэ̄гум? Наӈ мирын ос пӯп-ōйкат Наӈын āнумн мисаныл, мāныр Наӈ вāрсын?”36 Ӣсус лāвыглāлыс: ”Ам Хōн-мāм ты мир палт āтим. Тыт ке ōлыс, тōнт Āнумн лусытан хумиянум Āнум вуянтануваныл, тōнт Ам еврей мāхумын ат хӯлтнувем; ос ань Ам Хōн-мāм тыт āтим”.37 Пилат Тавēн лāвыс: ”Ос Наӈ Хōн?” Ӣсус ювле-лāвыс: ”Наӈ тох лāвēгын, э̄рттэ̄м Ам Хōн. Ам таимāгыс самын патсум ос таимāгыс ты мир палт ёхтысум, мирн мāк вēськат лāтӈыт урыл потыртаӈкве ёхтысум; мāк вēськат лāтыӈ хӯнтлан кāсыӈ хōтпа Ам потрумн хӯнтамлы”.
38 Пилат Тавēн лāвыс: ”Мāк вēськат лāтӈыт – таи мāныр?” Тох лāвме юи-пāлт еврейт палт кон-квāлыс ос тāнаны̄лн лāвыс: ”Ам Тав палтэ нэ̄матыр ōвылн патнэ вāрмаль ат хōнтсум.39 Нāн май тамле пӣсь ōньсегы̄н, Пасха кастыл акв хōтпа тāратаӈкве; нāн таӈхегы̄н ке, ам еврей Хōн лыпась тāратылум?”40 Тōнт пуссын атхатам мир та рōӈхалатāхтасыт: ”Таве āти, Варавва тāратэлын”. Варавва тай лю̄ль сылкаг ōлыс.
Глава 18
